ثورتى ضد القيود

الثورة هى ان تكتشف فى كل يوم جديد ان حياتك تحتاج الى التغيير

الثلاثاء، سبتمبر ٠٩، ٢٠٠٨

نظرية طفية السيجارة


سعيدة فعلا بالخطوة دى .. اللى يمكن هى مش مهمة خالص .. لكن كفاية انى اكون سعيدة بيها .. حتى لو تافهة و مش مهمة نهائى ..بالنسبة لغيرى و بالنسبالى كمان..برضه مش دا اللى كنت عايزة اقوله.. مبسوطة النهاردا لانى قررت بعد كل الصمت اللى كنت محبوسة فيه انى ارجع اتكلم من جديد و دى حاجة يمكن كنت متخيلة انى مش هقدر اعملها تانى خالص ..من غير لف و دوران كنت بفكر اسكت و اريح دماغى .. بس لقيت الدنيا تستاهل ان الواحد يبوح شوية..حتى لو لنفسه .. حاجات كتير كانت بتعدى على الواحد كانت تستاهل تتقال ... اغنية حلوة ..موقف مش ولابد أو ولابد .. حدث مهم .. حاجات كتير تستاهل .. بس كنت مش عارفة الالقى طاقة انى اتكلم .. او يمكن مش عارفة الاقى نفسى .. من غير مط و تطويل .. فى وقت قررت انى مش هكتب تانى ابدا لدرجة انى كنت شاكة انى نسيت الباسوورد بتاع البلوج لكن اكتشفت دلوقتى انى غبية ..فعل الكتابة و القراية عامل كدا زى لما تحب و تتحب حاجة كدا صعب موت انك تقرر انك تقلع عنها .. و الافضل متحاولش ..يمكن قررت انى اكتب بسبب اكتشاف وحيد .. اكتشفت انى مجرد طفية سيجارة فى قعر طفاية سجاير مليانة على اخرها باعقاب السجاير ...و قال ايه متخيلة نفسى انى ممكن اعمل معظم النار على اساس انى مستصغر الشرر .. و دا طبعا كلام فارغ .. لانى ببساطة طول ما انا راقدة فى قعر الطفاية مش هعمل اى حاجة .. وكل اللى هيحصل ان حد لطيف عنده انطباع حوالين نفسه انه شخص بيحب النظافة و يقوم دالقها فى اقرب زبالة .. و عادى بقى اهى بتتنسى زى كل اخواتها .. و لذلك قررت انى احاول اغير شوية فى حياتى و اعمل كدا منظر بدل الركود المميت اللى حاصل .. عشان مابقاش مجرد طفية سيجارة فاكرة قال ايه انها مستصغر الشرر و هى و اخواتها مش اكتر من مجرد سبارس ...
ملحوظة: اللى مش فاهم مش مهم يفهم .. مش لما افهم انا الاول

4 Comments:

  • At ٥:٠٠ م, Blogger مصطفى محيي said…

    حلوه نظرية طفية السيجارة ده يانهي ضحكت وانا بقرا الملحوظة الأخيرة، مش مهم نفهم مش مهم تفهمي المهم إنك قررتي تخرجي من الطفاية، من تحت ركام وبقايا السجاير اللي اتحرقت وانتهت

    مصطفي

     
  • At ١٠:٢٩ ص, Blogger nona said…

    شكرا يا مصطفى على التعليق اللطيف .. اعتقد انه فعلا كفاية كدا بقى انبطاح للركام اللى هيخنق الواحد ..
    الاستاذ الغير معروف بالتأكيد ان اللى انت كاتبه مش تعليق بالمرة على البوست بس يالا الشعر بتاع نجيب سرور اللى فى الويب سايت لطيف و دى الحاجة الوحيدة اللى مخليانى اسيب اللتعليق اللى ملوش علاقة بالموضوع

     
  • At ٢:١٨ م, Blogger Simsima said…

    حمدالله علي السلامة يا نونا يا جميلة، قولي وبوحي واملي الدنيا كلام ، أدينا علي الأقل بنفس بدال ما نطق ونموت...

     
  • At ١٢:١٣ م, Blogger nona said…

    الله يسلمك يا سمسة .. و الله على رأيك اللى ما يتكلمش يا كتر همه

     

إرسال تعليق

<< Home