تحت المطر
تحت المطر
الناس ماهيش طايقة
الكل كان مخنوق
و الدنيا متضايقة
مسكين يا صوت القمر
دى قلوبنا مش رايقة
مدبوح يا ليل السهر
و حياتنا مش فارقة
بينى و بينك سفر
موانى صفرا و سفن
صابتنا حالة خدر
سرقتنا كل المدن
و بينا دايما معاد
قبله و بعده البعاد
بينى و بينك دموع
ووعود طوال بالرجوع
…………..
بينى و بينك بحبك
خبينى قوى جوا قلبك
ليل المطر يختلف
بحسه لو كنت تبعد
كأنه انغام حزينة
او وقت رشق الرصاص
و لما تبقى قريب
بيبقى حبك سفينة
فيها الامل و الخلاص
نطوف بشوقنا المدينة
نشوف جموع م البشر
جاية بتجرى علينا
ولا قلب فيها اتكسر
بوشوش عليها ارتياح
جايين يباركوا شروقنا
يمدوا ايدهم لشوقنا
يحسوا بالحزن راح
و لا تلقى قلب اتقهر
تشوف طريق كله ورد
و اقدر ابوس ضحكتك
و لا افتكر اى برد
و نلاقى ناس يغضبوا
و ناس بيستغربوا
ازاى فى عز المطر
دايماً بنحضن بعض
**القصيدة مكتوبة فى 3/2005
posted by nona @ ٣:٥٦ م
2 Comments:
At ١١:٤٥ م,
ayman_elgendy said…
جامدة...وللأمام دوماً
At ١:٤٠ ص,
غير معرف said…
أولا تحياتى
ثانيا أنا اسمى لبنى باحثة فى مجال الإعلام أقوم بعمل دراسة عن المدونات المصريات من أجل الحصول على درجة الماجستير. و يسعدنى أن تكون مدونتك من ضمن المدونات التى يشملها البحث. . لذا أرجو أن ترسلى لى بريدك الالكترونى حتى اتمكن من إرسال الاستبان و طبيعة الدراسة إليك
رجاءا حارا مدة المشاركة مفتوحة حتى 8 نوفمبر
شكرا لتعاونك
lobnabona@yahoo.com
إرسال تعليق
<< Home